Ba dheas a bheith ag comhrá le Tristan Rosenstock ar An Cúinne Dána le déanaí faoi Tonn Teaspaigh agus Dánta Eile. Is féidir éisteacht siar leis anseo.
Dheineas féin agus Ceaití Ní Bheildiúin píosa cainte le Helen Ní Shé an mhí seo caite ar An Saol Ó Dheas.
Nice to see Tonn Teaspaigh agus Dánta Eile getting a mention in The Irish Times and the RTÉ website and on a list of books as Gaeilge.
Buíochas ó chroí le John Boy Ó Muireagáin, Louis de Paor agus Sinéad Ní Uallacháin as an dán ‘Fothragadh’ a chíoradh ar an gclár ‘Cóisir Filíochta’ le déanaí. Bhaineas taitneamh, leis, as an bplé ar shaothar Bhiddy Jenkinson agus Mháire Ní Mhurchú. Is féidir éisteacht siar leis an gclár ar BBC Sounds as seo go ceann míosa. Ag tnúth go mór leis an gcuid eile den tsraith!
Ba mhór an onóir dom dhá dhuais liteartha a fháil ag Oireachtas na Samhna i gCill Airne, ceann don gcnuasach is fearr (Tonn Teaspaigh agus Dánta Eile) agus ceann don dán is fearr (‘Litir ó Barcelona’). Is fada mé ag cur isteach ar na comórtaisí céanna! Seán Ó Mainín a ghlac an pictiúr thuas do Tuairisc.ie. Tá an tAire Stáit Jack Chambers ann, mar aon le Máirín de Brún, Uachtarán an Oireachtais, agus Stiofán Ó Móráin, cathaoirleach Oireachtas na Gaeilge.
Seolfaidh Dairena Ní Chinnéide cnuasach nua dánta liom ag Oireachtas na Samhna ar an 5ú Samhain ag 4.30. Tonn Teaspaigh agus Dánta Eile is teideal dó agus is é Éabhlóid atá á fhoilsiú. Beidh an ócáid ar siúl in Svuít 1, Leibhéal 1, INEC. Fáilte roimh chách!
Ag tnúth go mór leis an bhFéile Bheag Filíochta ar an mBuailtín an mhí seo chugainn. Is breá lem chroí an fhéile seo agus is cúis áthais dom go mbead féin i mbun na ceardlainne Gaeilge i mbliana. Beidh an t-ealaíontóir agus an rinceoir Siobhán Ní Dhuinnín ag léiriú trí scannán faoi thriúr ban: Máire Ní Chéilleachair, Áine Moynihan agus Ríonach Ní Néill. Is í an tOllamh Emerita Patricia Coughlan a thabharfaidh léacht na féile ar shaothar Mháire Mhac an tSaoi. Seolfar leabhar dátheangach le Ceaití Ní Bheildiúin dar teideal Lig don nGiorria Suí / Let the Hare Sit: Rogha Dánta / Selected Poems mar a bhfuil aistriúcháin le Paddy Bushe. Cloisfear ceol ar an Aoine le hEoin Duignan agus Noelie Ó Maoileoin. Maidin Shathairn a bheidh na ceardlanna, mé féin i mbun na ceardlainne Gaeilge agus Billy Ramsell i mbun cheann an Bhéarla. Beidh seimineáir san iarnóin ar shaothar Mháire Mhac an tSaoi mar a labharfaidh Máirín Nic Eoin, Louis de Paor, Bríd Ní Mhóráin agus Róisín Ní Ghairbhí. Beidh an sárcheoltóir Inni-K ag seinm oíche Dé Sathairn agus beidh a thuilleadh ceoil an mhaidin dar gcionn le Niamh Varian Barry. Beidh go leor deiseanna ag filí dán a reic ag na maidhceanna oscailte a bheidh ar siúl le linn an deireadh seachtaine. An clár iomlán le fáil anseo.
Ailbhe Ní Ghearbhuigh 
You must be logged in to post a comment.